Newyddion
Rhieni bl 13- Ffug gyfweliadau 23/1/20
Bydd eich mab/merch yn derbyn ffug gyfweliad ar fore 23/1 gan ddarparwyr allanol. Bydd slot amser penodol ar eu cyfer a disgwylir iddynt fod yn y neuadd 5 munud o flaen llaw o leiaf. Bydd yr amserlen yn cael ei rhannu â’r disgyblion maes o law. Disgwylir i bob disgybl fod yn bresennol a rhaid hysbysu Miss Lyall neu Mr B Davies os na allent fod yn bresennol.
13/01/2020, Lynwen Matthews
Amserlen Asesiadau Gwyddoniaeth
10/01/2020, Lynwen Matthews
Gwybodaeth Gyrfa Cymru
Mae’r cynghorydd Gyrfaoedd Cymru (Mrs Rhiannon Churchill) yn Ysgol Gyfun Bryntawe ar gael yn yr ysgol ar ddydd Llun, dydd Mercher a dydd Gwener. Os oes gan eich mab neu ferch ddiddordeb mewn trafod opsiynau gyrfa, 6ed dosbarth, colegau a phrentisiaethau, peidiwch ag oedi cyn cysylltu isod
Symudol | Mobile: 07890 274819
E-bost | E-mail: rhiannon.churchill@gyrfacymru.com | rhiannon.churchill@careerswales.com
Gwefan | Website: www.gyrfacymru.com | www.careerswales.com
8/01/2020, Lynwen Matthews
Arholiadau mewnol blwyddyn 13
7/01/2020, Lynwen Matthews
Arholiadau mewnol blwyddyn 12
7/01/2020, Lynwen Matthews
Taith Bontio Safon Uwch
Aeth criw o ddisgyblion sy’n astudio Cymraeg Safon Uwch ar daith gyda chriw o fl.11 sy’n ystyried astudio’r Gymraeg y flwyddyn nesaf i Aberystwyth am noson yn ystod mis Tachwedd. Gadawyd yr ysgol amser te ac wedi setlo yn llety’r Brifysgol ar gampws Aberystwyth, anelwyd am fwyty Byrgyr am y Prom am wledd a noson o gystadlaethau ysgafn- yn dasgau llenyddol a heriau hwyl eraill. Wedi brecwast yn y Byncws yn Aberystwyth, cafwyd sesiwn am gynghanedd yng nghwmni Eurig Salisbury, yna sesiwn gan Bleddyn Owen Huws am Dafydd ap Gwilym. Wedi hynny, croesawyd tri atom i roi gair o brofiad o ran cyflogadwyedd- am y modd y mae Cymraeg Safon Uwch a/ neu radd yn y Gymraeg wedi bod o fudd iddynt. Lefi Gruffudd oedd yr ymwelydd cyntaf o Wasg y Lolfa, yna Sulwen Richards sy’n gweithio i Adran Farchnata’r Brifysgol, a Miriam Glyn sy’n gyfieithydd i Lywodraeth Cymru. Cyn cinio, galwodd tair cyn-ddisgybl i mewn i sôn am eu profiad hwythau o astudio’r Gymraeg. Wedi cinio blasus yng Nghanolfan y Celfyddydau, aethon ni i’r “Drwm” yn y Llyfrgell Genedlaethol i fwynhau sesiwn gyda Peredur Lynch am yr Hengerdd ac yna sgwrs gyda Caryl Lewis ar ddiwedd y dydd. Ar y ffordd nol i’r ysgol amser te dydd Sadwrn, galwyd ger cofeb Tryweryn am lun o’r criw cyfan. Cwrs Pontio Safon Uwch llwyddiannus a fydd gobeithio yn ysbrydoli rhai o fl.11 i astudio’r cwrs y flwyddyn nesaf.
17/12/2019, Lynwen Matthews
Buddugoliaeth i’r Tîm Siarad Cyhoeddus
Llongyfarchiadau i dîm Siarad Cyhoeddus Cymraeg yr ysgol ar ennill Cystadleuaeth Genedlaethol y Rotari yn y Rownd Derfynol ym Mae Caerdydd. Testun y tim oedd “Mae dyddiau gwell i ddod i Gymru”. Caitlyn White oedd y Cadeirydd ac enillodd hi yr ail wobr am gadeirydd gorau’r gystadleuaeth. Steffan Leonard oedd y cynigydd a chafodd ef yr ail wobr am gynigydd gorau’r gystadleuaeth, a Nansi Eccott oedd y gwrthwynebydd a hithau’n ennill y drydedd wobr am y gwrthwynebydd gorau. Llongyfarchiadau mawr i’r tîm am gyrraedd y safle buddugol am y tro cyntaf yn hanes yr ysgol! Braf oedd dathlu gyda thaith Safon Uwch i Aberystwyth a chael lluniau gyda’r darian ar y Prom yn Aberystwyth ac wrth gofeb “Cofiwch Dryweryn” yn Llanrhystud.
17/12/2019, Lynwen Matthews